Sænskir sérsveitarmenn ráðast til inngöngu í peningageymsluna í morgun. AP

Lögreglan í Stokkhólmi hefur handtekið mann í tengslum við rannsókn á ráni í peningageymslu í suðurhluta borgarinnar í morgun. Ræningjarnir notuðu þyrlu við ránið, lentu henni á þaki geymslunnar og flúðu síðan í henni með peninga, að því er talið er með jafnvirði milljarða íslenskra króna.

Maðurinn er ekki talinn hafa tekið þátt í ráninu sjálfu en tengjast því samt með einhverjum hætti. Lögregla hefur lítið viljað tjá sig frekar um þetta.

Á blaðamannafundi nú eftir hádegið sagði Christian Agdur, einn af yfirmönnum Stokkhólmslögreglunnar, að ránið hefði verið vel skipulagt og undirbúið. Fram kom, að lögreglan hefði ekki viljað ráðast til inngöngu í bygginguna á meðan ræningjarnir voru þar sem talið var að þeir væru vel vopnum búnir. 

Ræningjarnir voru grímuklæddir og líklega vopnaðir vélbyssum. Þeir brutu sér leið inn í húsið af þakinu og notuðu sprengiefni til að komast inn í bankahvelfingar. Starfsmenn öryggisgæslufyrirtækisins G4S voru inni í byggingunni þegar ránið var framið klukkan 5:15 í morgun að sænskum tíma.

Þyrlan, sem ræningjarnir notuðu, fannst nokkru síðar í Arninge norðan við Stokkhólm. Þaðan virðast ræningjarnir hafa farið í bíl eða á mótorhjólum. Lögreglan hefur hert gæslu við landamærastöðvar og fylgist með flug- og ferjuumferð.