Lífstíðarfangelsi fyrir morð á lesbíu
Eudy Simelane
Baráttusamtök samkynhneigðra í Suður-Afríku fagna dómi yfir karlmanni sem var dæmdur í lífstíðarfangelsi fyrir að hafa myrt og tekið þátt í hópnauðgun á þekktri knattspyrnukonu þar í landi, Eudy Simelane. Hún var þekkt fyrir að berjast fyrir réttindum samkynhneigðra en hún var ein af fyrstu konunum í bænum KwaThema sem ekki fór leynt með það að vera lesbía.
Á vef BBC kemur fram að dómarinn, Ratha Mokgoathleng, hafi lýst árásinni sem hrottalegri og ósæmilegri en lík Simelane fannst 28. apríl í fyrra við skurð úti á akri. Henni hafði verið nauðgað og hún stungin með hnífi 25 sinnum. Hún var 31 árs. Yfir þrjátíu lesbíum hefur verið nauðgað og þær myrtar í árásum sem talið er að tengist kynhegðun þeirra. Nýverið kom fram á vef BBC að hugtakið „leiðréttingarnauðgun“ sé notað til að skýra hugarfar ofbeldismanna, sem nauðgi lesbíum og telji sig nánast í fullum rétti.
Dómarinn í málinu segist telja að Simelane og árásarmennirnir hafi þekkst en ráðist var á hana eftir að hún yfirgaf bar. Var síma hennar, íþróttaskóm og peningum rænt.Themba Mvubu, sem hafði lýst yfir sakleysi sínu af öllum ákæruliðum, var dæmdur í lífstíðarfangelsi en tveir félagar hans voru sýknaðir. Fjórði maðurinn, Thato Petrus Mpithi, játaði á sig morðið og rán fyrr á árinu en hann var dæmdur í 32 ára fangelsi fyrir brot sín.
Í grein sem birtist nýverið í sunnudagsblaði Morgunblaðsins er fjallað um morðið á Simelane. Þar kom meðal annars fram að fáum stöðum í heiminum eru nauðganir algengari en í Suður-Afríku og á meðal þeirra ríkja, sem taka þátt í starfi alþjóðalöggæslunnar Interpol, eru engin dæmi um verra ástand.
Samkvæmt tölum Interpol kæra um 150 konur í Suður-Afríku nauðgun á hverjum degi. Talið er að fjöldinn sé í raun miklu meiri, þar sem margar kjósi að kæra ekki. Ástæðurnar fyrir því eru margvíslegar, rétt eins og í öðrum löndum, en ein veigamikil er sú, að konurnar vita að rannsóknir nauðgunarmála eru fjarri því að vera forgangsatriði hjá lögreglu. Komi málin til kasta dómstóla á annað borð er sakfelling ólíkleg, eða dómar vægir.
Hópnauðganir eru algengar, svo algengar að til er hugtak yfir þann sem finnur fórnarlambið, „marhasimani“. Ungur maður útskýrði hlutverkið þannig, í samtali við BBC: „Marhasimani er sá sem fer á klúbb, kaupir nokkra drykki fyrir konu og fer svo með henni og hann og vinir hans eiga mök við hana.“
Vinirnir fela sig gjarnan í sama herbergi og marhasimani og stúlkan. Þegar sá fyrsti er búinn að hafa mök við hana taka þeir við. „Það er dimmt í herberginu og stelpan veit ekki einu sinni að þetta er annar náungi,“ sagði viðmælandi BBC.
Þegar fréttamaður reyndi að leiða honum og félaga hans fyrir sjónir að hegðun þeirra jafngilti hópnauðgun, neituðu þeir harðlega. „Þetta snýst ekkert um stelpuna. Við kaupum drykki fyrir hana. Og þeir eru dýrir. Þetta er ekki hópnauðgun. Ókei, stundum þurfum við að dópa hana og allt, en það gerist ekki alltaf.“
