Tvö lík hafa fundist í skipsflaki sem liggur á 500 metra dýpi skammt frá suðvesturströnd Ítalíu. Unnið hefur verið að því að rannsaka flakið þar sem grunur leikur á að þar sé að finna geislavirkan úrgang.

Skipið hefur verið myndað með neðansjávarmyndavél. Þar hafa sést appelsínugular tunnur sem á stendur „eiturefni“. Þetta kemur fram á fréttavef breska ríkisútvarpsins.

Ítalskir embættismenn telja að mafían í Calabríu hafi hagnast á því að sökkva bátnum.

Skipið fannst eftir að lögreglan fékk upplýsingar frá heimildarmanni, sem starfar fyrir mafíuna. Hann segist hafa tekið þátt í því að eyðileggja skip sem í hafi verið geislavirkur auk annars úrgangs.

Ítalskir saksóknarar segja að það sé mögulegt að hluti skipsáhafnarinnar hafi annað hvort ekki vitað að það hafi staðið til að sökkva skipinu, eða þá þeir hafi verið teknir vísvitandi af lífi. Þetta muni koma í ljós þegar skipið hefur verið dregið á land.

Heimildarmaður lögreglunnar, sem er nú í stofufangelsi, segist hafa sjálfur sökkt tveimur skipum og hann viti af að minnsta kosti 30 skipum til viðbótar sem mafían hafi sökkt.

Hann hefur tjáð lögreglunni að úrgangurinn komi frá ítölskum og evrópskum lyfjafyrirtækjum og að mafían hafi fengið greiddar á bilinu tvær milljónir til 20 milljónir dala fyrir að sökkva skipunum.