Matti Vanhanen, forætisráðherra Finnlands, og Fredrik Reinfeldt, forsætisráðherra Svíþjóðar, á Íslandi fyrr á þessu ári. mbl.is/RAX

Stjórnarandstaðan í Finnlandi hefur krafist þess, að Matti Vanhanen, forsætisráðherra, segi af sér embætti vegna hneykslismáls sem komið er upp í landinu. Í ljós hefur komið, að fyrirtæki og kaupsýslumenn greiddu háar fjárhæðir í kosningasjóði tveggja stærstu stjórnarflokka landsins fyrir kosningarnar árið 2007.

„Við reiknum með því, að forsætisráðherrann dragi þá ályktun, að hann njóti ekki þess trausts, sem nauðsynlegt er fyrir mann í hans stöðu, og segi af sér. Það myndi leiða til myndunar nýrrar ríkisstjórnar og hugsanlega kosninga," hefur AFP fréttastofan eftir Anniku Lapintie, þingflokksformanni Vinstribandalagsins, stærsta stjórnarandstöðuflokks Finnlands.

Vanhanen segist ætla að gefa þinginu skýrslu á miðvikudag um framlög í kosningasjóði stjórnarflokkanna. Í kjölfarið fer fram umræða um skýrsluna og atkvæðagreiðsla um vantrauststillögu á stjórnina.  „Ég tel að bæði forsætisráðherrann og ríkisstjórnin muni standa sig vel í þeirri umræðu," hefur Hufvudstadsbladet eftir Vanhanen.

Það eru einkum Miðflokkurinn, flokkur Vanhanens, og Þjóðarbandalagið sem hafa blandast í hneykslið. Fréttir benda til þess, að Græningjar, sem eiga einnig aðild að ríkisstjórninni, kunni að styðja vantrauststillögu.