Bjóða í olíuauð Nígeríu
Merki kínverska olíurisans CNOOC.
Kínversk stjórnvöld hyggjast stórauka umsvif sín í olíuvinnslu í Afríku með því að bjóða í vinnslu á svæði þar sem er að finna um sjötta hluta olíubirgða Nígeríu, að því er fram kemur í bréfi sem lekið var frá skrifstofu Nígeríuforseta. Tilboðið gæti leitt til hagsmunaáreksturs við vestræna olíurisa.
Ræðir þar um olíurisa á borð við Shell, Chevron, Total og ExxonMobil en þeir eiga þegar hlut í olíuvinnslureitunum 23 sem kínverski olíurisinn CNOOC, sem er í ríkiseigu, hefur gert 49% tilboð í.
Óvíst er hvort þessi hluti feli í sér yfirtöku á hlut vestrænu olíufyrirtækjanna eða hlut nígeríska ríkisins í svæðunum.
Fjallað er um málið í breska dagblaðinu Financial Times en þar segir að ef tilboðinu verði tekið muni olíubirgðir Kínverja í Afríku tvöfaldast.
En Kínverjar hafa þegar tryggt sér miklar olíubirgðir í álfunni í skiptum fyrir uppbyggingu innviða í blásnauðum ríkjum á borð við Angóla og Austur-Kongó.
Munu íhuga hagstæðara boð
Bréfið sem lekinn byggir á er dagsett 13. ágúst síðastliðinn en þar kemur fram að skrifstofa Umaru Yar'Adua forseta hafni boðinu, sem talið er vera á milli 30 og 50 milljarðar dala, eða frá sem svarar 3.740 til 6.190 milljörðum króna, á núverandi gengi, með þeim orðum að betra tilboð verði tekið til greina.
Staða ríkjanna er ólík. Spilling og skortur á fjárfestingu hamlar orkuinnviðum Nígeríu á sama tíma og Kínastjórn nýtur þess í kreppunni að geta keypt sig inn í auðlindir á hagstæðara verði en fyrir fjármálahrunið, sem ógnað hefur efnahagslegu sjálfstæði margra ríkja.
Ljóst þykir að ýmsar hindranir eru í vegi þess að samkomulag náist um tilboð Kínverjanna í nígeríska stjórnkerfinu og hafa verið leiddar líkur að því að lekinn sé settur á svið til að ná fram betri tilboðum frá vestrænum olíufyrirtækjum.
Hirða lítt um líf Nígeríumanna
Einnig er fjallað um málið á vef Daily Telegraph en þar segir að ímynd Kína í Nígeríu hafi beðið hnekki eftir að fréttir bárust af því að Kínastjórn hefði óskað eftir leyfi til að brenna lík um 30 Nígeríumanna sem létust í kínverskum fangelsum eftir að hafa verið ákærðir fyrir svik, brot á innflytjendalögum og eiturlyfjabrot.
Í kjölfarið sá talsmaður Nígeríustjórnar tilefni til að gefa út yfirlýsingu um að Nígeríustjórn gæti ekki sætt sig við þá stöðu að þegnar landsins væru beittir harðræði og látnir sæta ómannúðlegri meðferð utan landsins.
Olíubirgðastöð í Nígeríu.
