Starfsmaður bandarísku veðurfræðistofnunarinnar NOAA skoðar tölvuskjá með útreikningum um flóðbylgjuna. Reuters

Að minnsta kosti 14 manns létust og 50 slösuðust á Bandarísku Samóa þegar flóðbylgja fór yfir Samóaeyjar í Kyrrahafi í kvöld í kjölfar öflugs jarðskjálfta. Þá er óttast að 5 hafi farist á nágrannaeyjunni Samóa. Varað var við flóðbylgjuhættu á öðrum eyjum í Suður-Kyrrahafi en sú hætta er liðin hjá.

Jarðskjálftinn, sem var um 8 stig á Richter, varð undir hafsbotni í um 200 km fjarlægð frá Samóaeyjum. Svo virðist sem mesta tjónið hafi orðið á suðurhluta eyjanna þar sem allt að 8 metra háar öldur skullu á ströndinni. Á Bandarísku Samóaeyjum var ástandið verst í fjórum þorpum á eyjunni Tutuila. 

Fulltrúi Bandarísku Samóaeyja í öldungadeild Bandaríkjaþings sagði, að jafðskjálftinn og flóðbylgjan hefðu valdið miklu tjóni á eyjunum. Þúsundir manna hefðu misst heimili sín.  

„Þetta var jarðskjálfti, sem olli flóðbylgju. Sum svæðin eru aðeins nokkra tugi sentimetra yfir sjávarmáli og því er auðvelt að gera sér í tjónið í hugarlund," sagði  Eni Faleomavaega við AFP fréttastofuna.

Faleomavaega sagðist hafa haft samband við embættismenn á eyjunum og hafði eftir þeim, að hús hefðu jafnast við jörðu og bílar væru víða á floti. Hann sagði að fulltrúar almannavarnaráðuneytis Bandaríkjanna væru að undirbúa að fara til eyjanna til að meta ástandið.

„Við vonumst til að geta flutt matvæli og hjálpargögn og það er verið að undirbúa slíkan flutning. Sjálfur sagðist  Faleomavaega vera að reyna að útvega flugfar til Samóa en það gengi illa.