Helga Bára Bragadóttir, er sendifulltrúi Rauða krossins á Kyrrahafseyjunum en eins og fram hefur komið riðu flóðbylgjur yfir Samóaeyjar í gærkvöldi í kjölfar jarðskjálfta. Yfir eitt hundrað eru látnir og er Rauði krossinn að störfum á svæðinu. Helga Bára er staðsett á Fitji sem er skammt frá Samóa.

Rauði kross Íslands hefur opnað söfnunarsímann 904 1500 fyrir þá sem vilja styðja hjálparstarf meðal fórnarlamba flóðanna á Kyrrahafseyjum. Þá dragast 1500 kr. frá næsta símreikningi.

Að sögn Helgu Báru munaði miklu á Samóa um starf 135 sjálfboðaliða Rauða krossins sem þustu á strandsvæði til að láta vita af yfirvofandi flóðbylgju.  Rauði krossinn hefur  komið upp fimm tjaldbúðum fyrir fólk sem komst lífs af úr flóðbylgjunni. Sjálfboðaliðar eru þessa stundina að dreifa plastdúkum, drykkjarvatni og sjúkragögnum meðal 10 – 15 þúsund manna sem urðu að flýja heimili sín.

Fjöldi þorpa varð einnig fyrir flóðbylgjunni á Tonga, þar sem sjálfboðaliðar Rauða krossins sinna einnig hjálparstarfi. Rauða kross félög eru á öllum eyjunum í Kyrrahafi, þar sem alls eru þrettán sjálfstæð ríki, að því er fram kemur í tilkynningu frá Rauða krossinum.

Að minnsta kosti 77 létust á Samóaeyjum, yfir 25 á Bandarísku Samóaeyjum og að minnsta kosti sex á Tonga. Á Samóaeyjum hafa einhver þorp hreinlega þurrkast út og hundruð eru heimilislaus á Bandarísku Samóaeyjunum.

Skjálftinn var 8,3 stig á Richter og varð undir hafsbotni, um 200 km frá Samóaeyjum.  Í kjölfarið reið 4,5 metra há flóðbylgja yfir hluta eyjanna.