Gríðarleg eyðilegging varð í borginni Padang á eyjunni Súmötru. Reuters

Stjórnvöld á Indónesíu óttast að mörg þúsund manns hafi látist þegar öflugur jarðskjálfti reið yfir landið í gær. Örmagna björgunarsveitarmenn hafa leitað í húsarústum með berum höndum að fólki sem gæti verið á lífi.

Flugvélar með matvæli og hjálpargögn eru byrjaðar að lenda á eyjunni Súmötru þar sem eyðileggingin varð mest. Annar öflugur skjálfti varð svo enn sunnar, sem olli frekari skelfingu með almennings auk þess sem slösuðum fjölgaði.

Jarðskjálftinn, sem varð síðdegis í gær, mældist vera 7,6 á Richter. Hann jafnaði hús við jörðu og víða kviknuðu eldar í borginni Padang, en þar býr um ein milljón manna. Allt rafmagn og öll fjarskipti liggja nú niðri í borginni.

John Holmes, aðstoðarframkvæmdastjóri Sameinuðu þjóðanna, telur að tala látinna sé komin yfir 1.100 manns.

Holmes segir að fjölmargir hafi slasast og talið sé að tala látinna og særðra muni hækka enn meira.

„Við teljum að mörg þúsund manns hafi látið lífið,“ sagði talsmaður heilbrigðisráðuneytisins í Indónesíu.

Víða er búið að koma upp neyðaskýlum fyrir íbúana. Reuters