Einn þeirra sem helst hefur verið leitað í tengslum við þjóðarmorðin í Afríkuríkinu Rúanda árið 1994 hefur verið handtekinn í Úganda. Um er að ræða fyrrum yfirmann leyniþjónustu Rúanda, Idelphonse Nizeyimana, en hann er ákærður fyrir að hafa meðal annars fyrirskipað morðið á drottningu Tútsa auk þúsunda annarra Tútsa.

Á vef BBC kemur fram að fréttamenn telja að Nizeyimana hafi verið á ferðalagi til Kenýa frá Lýðveldinu Kongó er hann var handtekinn í höfuðborg Úganda, Kampala. Á hann að hafa verið með fölsuð persónuskilríki á sér.

Um 800.000 Tútsar og Hútúar voru myrtir af hersveitum Hútú á aðeins 100 dögum árið 1994. Idelphonse Nizeyimana var yfirmaður í her Rúanda á tímum þjóðernishreinsananna.  Er hann talinn hafa komið á fót sérstakri aftökusveit innan hersins til þess að annast fjöldamorðin.

Meðal fórnarlamba hans var drottning Tútsa, Rosalie Gicanda, sem var ekkja Mutara III konungs Rúanda. Hann lést árið 1959 skömmu áður en landið fékk lýðræði. Samkvæmt skýrslu mannréttindasamtakanna Human Rights Watch frá árinu 1999, handtóku Hútu hermenn hana á heimili hennar og skutu hana til bana við ríkislistasafnið. Jafnframt voru nokkrar konur sem gættu drottningarinnar myrtar. Drottningin var um áttrætt þegar hún var myrt.

Talsmaður lögreglunnar í Úganda staðfesti við BBC að Nizeyimana hafi verið handtekinn  fyrr í dag og að hann hafi verið fluttur til glæpadómstólssins í málefnum Rúanda í Arusha í Tansaníu. Hann á yfir höfði sér ákæru um glæpi gegn mannkyninu og þjóðarmorð.

Meðal þess sem hann er ákærður fyrir er að hafa fyrirskipað hermönnum að ræna hópi flóttamanna, þar á meðal 25 börnum, úr klaustri. Ekkert hefur spurst til flóttamannanna síðan. Jafnframt að hafa fyrirskipað rán og morð á tveimur prestum. 

Hann á að hafa látið setja upp vegartálma þar sem persónuskilríki þeirra sem áttu leið um voru skoðuð. Ef Tútsi var á ferð var hann myrtur. Hermenn á vegum Nizeyimana fóru um háskólann í Butare þar sem bæði fræðimenn og nemendur voru skotnir af handahófi. Með því vonaðist hann til þess að hægt væri að fækka Tútsum með háa greindarvísitölu.