George Osborne, talsmaður breska Íhaldsflokksins í fjármálum, kynnti í gær áform forystumanna flokksins um sparnaðaraðgerðir til að minnka fjárlagahallann. Osborne sagði í ræðu á flokksþingi íhaldsmanna í Manchester að flokkurinn hygðist m.a. frysta laun um fjögurra milljóna ríkisstarfsmanna í eitt ár ef flokkurinn kemst til valda í næstu kosningum. Hægt verður þó að hækka laun breskra hermanna í Afganistan og ríkisstarfsmanna með minna en 18.000 pund (3,6 milljónir króna) í árslaun. Gert er ráð fyrir því að um milljón ríkisstarfsmanna geti fengið launahækkun.

Með þessum áformum gengur Íhaldsflokkurinn lengra en stjórn Verkamannaflokksins sem kynnti í fyrradag áform um að frysta laun 750.000 launahæstu starfsmanna ríkisins, þeirra á meðal dómara, stjórnenda ráðuneyta, framkvæmdastjóra og lækna.

Osborne sagði að áætlað væri að öll sparnaðaráform Íhaldsflokksins myndu spara alls 23 milljarða punda (4.600 milljarða króna) á næstu fimm árum, eða allt að 7 milljarða punda (1.400 milljarða króna) á ári.

Auk launafrystingarinnar er m.a. ráðgert að minnka rekstrarkostnað ráðuneyta um þriðjung. Áætlað er að það spari rúma þrjá milljarða punda (600 milljarða kr.) og verði til þess að þúsundir manna missi vinnuna, að sögn The Daily Telegraph.

Íhaldsflokkurinn stefnir einnig að því að takmarka eftirlaun hátt settra embættismanna við 50.000 pund (tíu milljónir króna) á ári.

Samkvæmt sparnaðaráformum flokksins á enginn nýr embættismaður að geta fengið hærri laun en forsætisráðherrann nema með sérstöku leyfi fjármálaráðuneytisins. Þá verða laun ráðherra og aðstoðarráðherra lækkuð um 5%, stefnt er að því að þingmönnum verði fækkað um 10% og nýir þingmenn eiga ekki að fá sömu lífeyrisréttindi og núverandi þingmenn.

„Erum öll í þessu saman“

Osborne sagði að hann gæti ekki hugsað sér við þessar aðstæður að lækka skatta á hátekjufólk, sem stjórn Verkamannaflokksins hækkaði í 50%. Hann lagði áherslu á að efnamenn gætu ekki skorast undan því að axla byrðarnar með öðrum. „Við erum öll í þessu saman,“ sagði hann nokkrum sinnum í ræðunni.

Osborne sagði að áformum um að hækka eftirlaunaaldur karlmanna úr 65 í 66 ár yrði flýtt, hugsanlega til ársins 2016. Stefnt er að því að eftirlaunaaldur kvenna hækki í 66 ár fyrir árið 2020, en hann er nú 60 ár. Gangi þetta eftir þurfa um 2,5 milljónir Breta á aldrinum 48-57 ára að vinna a.m.k. ári lengur en þeir bjuggust við.

Gert er ráð fyrir því að fjárlagahalli Bretlands hækki í 175 milljarða punda í ár og stjórn Verkamannaflokksins hefur lofað að minnka hann um helming ekki síðar en árið 2014. Íhaldsflokkurinn hyggst minnka hallann hraðar með sparnaðaraðgerðunum.