Fríðindahneykslið var ekki til að auka traust á Gordon Brown forsætisráðherra og bresku stjórnarelítunni. POOL

Fulltrúi breskra þingmanna segir marga þeirra ekki tilbúna til að endurgreiða óeðlilegar greiðslur til þeirra frá ríkinu í fríðindahneykslinu svokallaða. Í mörgum tilfellum er um að ræða háar fjárhæðir og er því borið við að endurgreiðslan gæti reynst þingmönnunum þung í skauti.

Fjallað er um málið á vef breska dagblaðsins The Daily Telegraph, sem kom fríðindahneykslinu í hámæli, en þar segir að viðbrögð þingsins við rannsókninni geti leitt til nýrrar reiðiöldu í Bretlandi. Upplýsingar um misnotkunina á síðasta árinu áður en hún uppgötvaðist geti aukið á þá reiði.

Um 100 þingmenn hyggjast láta af þingmennsku um næstu kosningar auk fjölda annarra þingmanna sem er farinn að hugsa sér til hreyfings fyrir líklega valdatöku íhaldsmanna.

Þessi hópur sér því fram á tekjuskerðingu og segir blaðið marga þingmenn farna að undirbúa málsvörn til að komast hjá því að endurgreiða féð.

Í sem stystu máli snerist hneykslið um kerfisbundna og útbreidda misnotkun þingmanna á kerfi sem ætlað er að létta undir með þeim vegna reksturs annars heimilis.

Kerfinu er ætlað að styrkja fjárhagslegt sjálfstæði þingmanna en í ljós kom að þingkonur og karlar sýndu ótrúlega dirfsku í að senda ríkinu reikninginn, svo sem fyrir skraut og ýmiss konar prjál á heimili sínu.

Þá gengu sumir þingmenn svo langt að láta niðurgreiða aðra fasteign sína, þótt þeir ættu kost á ókeypis húsnæði.