Ung börn ættu ekki að horfa á sjónvarp, að mati ástralskra yfirvalda. Arnaldur Halldórsson

Börn ættu ekki að horfa á sjónvarp fyrr en þau ná tveggja ára aldri. Sjónvarpsáhorf er talið geta hamlað málþroska og einbeitingarhæfni yngri barna, samkvæmt nýjum leiðbeiningum í Ástralíu.

Þess er vænst að leiðbeiningar ástralskra stjórnvalda um sjónvarpsáhorf ungra barna verði gefnar út í næstu viku. Þar mun koma fram að börn á aldrinum 2-5 ára ættu ekki að horfa lengur á sjónvarp en í eina klukkustund á dag, að sögn ástralska dagblaðsins The Australian í dag.

Leiðbeiningarnar voru samdar fyrir barnaheimili en koma foreldrum einnig að notum. Þeim er ætlað að sporna gegn aukningu offitu meðal barna en áströlsk börn hafa aldrei verið jafn þung og nú. 

„Samkvæmt nýjustu rannsóknum  er mælt með því að börn undir tveggja ára aldri horfi ekki á sjónvarp eða noti rafræna afþreyingu (t.d. DVD, tölvur og tölvuleiki),“ segir í leiðbeiningunum.

Talið er að sá tími sem börnin verja við skjáinn komi í veg fyrir virka leiki, félagsleg samskipti við aðra og hindri málþroska. Þá getur sjónvarpsglápið einnig haft áhrif á þroska augnhreyfinga og dregið úr hæfni til að einbeita sér.

Áströlsk stjórnvöld vildu ekki staðfesta fréttina en sögðu að enn væri verið að leggja lokahönd á leiðbeiningarnar.