Verkið og staðsetning fingrafarsins.

Listfræðingar eru farnir að hallast á þá skoðun að áður óþekkt málverk sé eftir Leonardo da Vinci. Reynist þetta rétt er verðmætið áætlað um 20 milljarðar íslenskra króna. Verkið var boðið upp hjá Christie’s í New York árið 1998 og var þá slegið á aðeins um 2,2 milljónir króna.

Málið er stórfrétt í listaheiminum enda skildi þessi holdgervingur endurreisnarinnar aðeins um tylft málverka eftir sig.

Aldursgreining á kolefni í verkinu og greining með innrauðum geislum á striganum benda til hins sama en sterkasta sönnunargagnið er þó brot úr fingrafari sem talið er af fingri meistarans.

Fingrafarið er sagt mjög líkt fingrafari á öðru verki Leonardo, St. Gerome, í Vatíkaninu, en það málaði hann á því skeiði þegar hann notaðist ekki við aðstoðarmenn.

Martin Kemp, prófessor emeritus við Oxford-háskóla, er sannfærður um að verkið sé eftir Leonardo.

Kemp, sem hefur skrifað óútkomna bók um málið, kveðst á áratuga löngum ferli sínum ekki hafa séð neitt þessu líkt.

Eftir að hafa beitt útilokunaraðferðinni telur Kemp sig hafa vissu fyrir því að stúlkan á myndinni sé Bianca Sforza, dóttir Ludovico Sforza, Hertogans af Mílanó (1452-1508) og hjákonu hans, Bernardina de Corradis. 

Martröð listaverkasalans

Kate Ganz, listmunasali í New York, keypti verkið á uppboði Christie's á sínum tíma.

Hann seldi það hins vegar aftur til fagurkerans Peter Silverman sem lýsir fyrsta augnablikinu sem hann sá verkið svo að hann hafi umsvifalaust grunað að það væri eftir samtímamann Leonardo, ef ekki hann sjálfan.

En áður hafði Ganz ályktað að verkið væri eftir þýskan listnema sem hefði hermt eftir stílbrögðum málarans.

Hann hlýtur nú að naga sig í handarbökin enda er hagnaður Silvermans af viðskiptunum, ef rétt reynist og verðmatið er rétt, 19,98 milljarðar króna.

Fjallað er um málið á vef Times.

Fingrafarið er sagt mjög líkt fingrafari á öðru verki Leonardo, St. Gerome, í Vatíkaninu.