Kona slasaðist lítillega þegar bílsprengja tengd bifreið hennar sprakk í Belfast á Norður-Írlandi fyrr í dag. Konan er kærasta lögreglumanns sem starfar hjá norður-írsku lögreglunni og er því óttast að árásin sé upphafið á endurteknum ofbeldisverkum í landshlutanum.

Atvikið átti sér stað snemma í morgun, en sprengjan sprakk þegar hún ræsti bifreið sína fyrir utan heimili sitt. Konunni var ekið á nærliggjandi spítala til aðhlynningar og var útskrifuð að skoðun lokinni.

„Það er augljóst að það er fólk þarna úti í þjóðfélaginu í dag sem hefur það enn í hyggju að myrða fólk og meiða,“ er haft eftir Brian Maguire, yfirlögregluþjóni sem neitaði að nefna tiltekin samtök í því samhengi.

Samkvæmt upplýsingum frá lögreglunni hafði sprengjunni verið komið fyrir undir farþegasætinu, þannig að ljóst má vera að hefði einhver setið þar hefði sá hlotið lífshættuleg meiðsli.

„Sprengjan hefði raunverulega getað drepið einhvern eða valdið mjög alvarlegu líkamstjóni,“ segir Maguire.

Hann segir konuna ekki hafa nein bein tengsl við lögregluna, en rannsóknarlögreglumenn kanni nú hvort kærasti hennar, sem er starfandi lögreglumaður, hafi verið ætlað skotmark. Konan bjó skammt frá lögreglustöð í austurhluta Belfast.

Lögreglunni barst nýverið hótanir frá baráttusamtökum lýðveldissinna og í framhaldi var lögreglumönnum ráðlagt að skoða undir bifreiðar sínar í leit að sprengjum. Slíkar ráðstafanir voru algengar þá þrjá áratugi sem hatrömm deila stóð um sjálfstæði Norður-Írlands sem leiddi til dauða 3.500 manna.

Deilunni milli kaþólikka, sem óska eftir því að Norður-Írland verði hluti af sjálfstæðu Írlandi, og mótmælenda, sem vilja að Norður-Írland heyri undir Breta, lauk mestmegnis 1998 með friðarkomulagi sem kennt er við Föstudaginn langa.

Fyrr á þessu ári voru tveir hermenn og einn lögreglumaður drepnir og lýstu meðlimir baráttusamtaka lýðveldissinna drápunum á hendur sér.