Rauða torgið í Moskvu mbl.is/Einar Falur

Rússneskur dómstóll hefur dæmt serbneskan karlmann í átta ára fangelsi fyrir að reyna að selja Bandaríkjamönnum upplýsingar um rússneska herinn.

Serbinn, Alexander Georgiyevich,  var dæmdur fyrir tilraun til landráðs. Í tilkynningu frá rússnesku leyniþjónustunni, FSB, kemur fram að maðurinn hafi haft yfir höndum leynilegar upplýsingar um búnað hersins og eldflaugar hans.

Fyrir rétti játaði Georgijevic sekt að hluta og hlaut vægari dóm vegna játningar og fyrir aldurssakir en hann er 63 ára að aldri. Eins hafði áhrif að hann þjáist af sykursýki og er með hreint sakavottorð.

Samkvæmt upplýsingum frá FSB safnaði hann upplýsingunum fyrir bandarískan mann sem nefndur er Farid Rafi. Á hann að hafa starfað fyrir leyniþjónustu Bandaríkjanna. 

Georgijevic var handtekinn á flugvellinum í Moskvu árið 2007. Samkvæmt RIA Novosti fréttastofunni var hann handtekinn þegar hann fór í gegnum vegabréfsskoðun. Hefur hann verið í haldi síðan.

Georgijevic og Rafi voru yfirheyrðir á sínum tíma í tengslum við rannsókn FSB á Viktor Kalyadin, rússneskum kaupsýslumanni sem var handtekinn árið 1999. Var hann ákærður fyrir að hafa komið leynilegum upplýsingum til bandarísku leyniþjónustunnar. Kalyadin var dæmdur í fjórtán ára fangelsi árið 2001 og lést í fangelsi árið 2004.