Alþjóðakjarnorkumálastofnunin (IAEA) hefur sent Írönum, Bandaríkjamönnum, Rússum og Frökkum uppkast að samkomulagi, sem miðar að því að draga úr áhyggjum alþjóðasamfélagsins af kjarnorkuáætlun Íran. IAEA lagði þetta til eftir viðræður í Vín. Stofnunin vill í síðasta lagi fá svör á föstudag.

Ekki liggur fyrir hvað stendur í samkomulaginu, en talið er að þar komi fram að Íranar flytji út úran sem verði síðan auðgað í Frakklandi og Rússlandi. Þetta kemur fram á fréttavef BBC.

Aðalsamningamaður Írana í kjarnorkumálum hefur ekki tjáð sig um málið.

Auk Írana, Rússa, Frakka og Bandaríkjamanna tóku fulltrúar Sameinuðu þjóðanna þátt í viðræðunum.

Mohamed ElBaradei, yfirmaður IAEA, sagði við fréttamenn í Vín í Austurríki að hann væri bjartsýnn á framhaldið. Viðræðurnar hafi verið afar uppbyggilegar.

„Allir á fundinum reyndu að leggja hönd á plóg, horfa til framtíðar en ekki til fortíðar og reyndu að græða sár sem hafa ekki fengið að jafna sig í mörg ár.“

„Ég er búinn að dreifa uppkasti að samkomulagi, sem að mínum dómi, endurspeglar yfirvegaða leið fram á við.“

Heimildarmenn breska ríkisútvarpsins, sem starfa við rússneska kjarnorkuiðnaðinn, segja að samkomulagið snúist um það að Íranar sendi úran til fulltrúa IAEA, sem síðan sendi úranið til Rússa. Þeir muni síðan sjá um að auðga efnið.

Auðgað úran yrði svo aftur sent til IAEA sem myndu senda það svo til Frakklands, en Frakkar búi yfir tækni til að bæta við mikilvægum þáttum fyrir íranska kjarnakljúfinn.

Með þessu gætu Íranar fengið nægilega mikið af auðguðu úrani, sem rannsóknarkjarnakljúfur gæti notað. Magnið sé hins vegar ekki nægilega mikið til að búa til vopn.