Kortið sýnir hvernig flugvélin fór framhjá Minneapolis, snéri við og lenti síðan á flugvelli borgarinnar. AP

Tveir bandarískir flugmenn, sem gleymdu sér í flugstjórnarklefa yfir fartölvum sínum og flugu 240 km lengra en til stóð, hafa verið sviptir flugréttindum sínum. Þeir geta áfrýjað þeirri ákvörðun bandarísku flugmálastjórnarinnar til öryggismálastofnunar samgöngumála.

Mál flugmannanna tveggja vakti mikla athygli um síðustu helgi en þeir stjórnuðu flugvél Northwest flugfélagins og voru á leið frá San Diego til Minneapolis með 147 farþega. Þeir gleymdu sér og vissu ekki fyrr en þeir voru komnir framhjá Minneapolis.  

Flugmennirnir sögðust fyrst hafa lent í áköfum samræðum og ekki tekið eftir leiðarmerkjum og viðvörunum frá flugumferðarstjórum. En í ljós kom að þeir höfðu aðeins verið að ræða um breytingar á vaktaáætlun í tengslum við samruna flugfélaganna Northwest og Delta. Þá voru þeir einnig báðir að nota fartölvur sínar, sem er brot á reglum fyrirtækisins.

Báðir eru flugmennirnir, sem eru 53 og 54, mjög reyndir og hafa aldrei lent í vandræðum í vinnunni fyrr. Þá eru þeir einnig við bestu heilsu.