Annar mannanna, sem handteknir voru í Bandaríkjunum, grunaðir um að hafa áformað hryðjuverkaárásir á ritstjórnarskrifstofur Jyllands-Posten í Danmörku, segir að hinn maðurinn hafi blekkt sig og sjálfur hafi hann ekkert vitað af hryðjuverkaáformum.

Bandaríska alríkislögreglan segir, að Tahawwur Hussein Rana, 48 gamall kanadískur ríkisborgari af pakistönskum ættum og hefur búið í Bandaríkjunum í 15 ár, hafi  notað innflytjendaþjónustu, sem hann rekur, til að aðstoða  David Coleman Headley, 49 ára bandarískan ríkisborgara, til að ferðast til Danmerkur og undirbúa árásirnar.

Lögmaður Rana sagði fyrir dómi í dag, að þótt skjólstæðingur hans kunni að hafa vitað að Headley væri tengdur íslömskum öfgahópum í Pakistan hefði hann ekki haft hugmynd um að Headley áformaði árásir í Danmörku. 

Lögmaðurinn bað dómarann að sleppa Rana gegn tryggingu. Saksóknarar sögðu hins vegar að mikil hætta væri á að Rana myndi flýja land og kröfðust þess að hann yrði áfram í varðhaldi. Dómari tók sér frest til að íhuga málið, sem hann sagði afar flókið.

Headley viðurkenndi eftir að hann var handtekinn, að hann hefði skoðað ritstjórnarskrifstofur Jyllands-Posten bæði í Árósum og Kaupmannahöfn til að undirbúa árásina. Hann mun koma fyrir dómara 4. desember.  

Headley var handtekinn 3. október á flugvellinum í Chicago þegar hann var í þann mund að stíga um borð í flugvél á leið til Pakistans.