Túnfiskveiðiskip í Reykjavíkurhöfn. Kristinn Ingvarsson

Vísindamenn í alþjóðanefnd um vernd Atlantshafstúnfisks styðja bann við veiðum á bláuggatúnfiski í Atlantshafi. Tegundin er í hættu vegna ofveiði, að því er umhverfissamtökin WWF og Greenpeace sögðu í dag.

Vísindamennirnir í túnfisknefndinni (International Commission for the Conservation of Atlantic Tuna) segja að hrygningarstofninn sé nú einungis 15% af því sem hann var áður en veiðar hófust. Því uppfylli bláuggatúnfiskur skilyrði fyrir því að vera skráður í viðauka I á lista CITES.

Ef tegundin verður skráð í viðauka I við CITES, stofnun Sameinuðu þjóðanna gegn ólöglegri verslun með villt dýr, verða öll viðskipti með afurðir bláuggatúnfisks bönnuð.

Þá segir í skýrslu vísindamannanna að greining þeirra staðfesti að eina leiðin til að byggja stofninn upp sé að hætta veiðum á tegundinni í atvinnuskyni. Með því megi vænta þess að tegundin nái sér og uppfylli ekki skilyrði þess að lenda á viðauka I árið 2019.

Bláuggatúnfiskur er uppistaða í mörgum sushi réttum og mjög vinsæll í Japan. Um 80% af Atlantshafs bláuggatúnfiski eru veidd í Miðjarðarhafinu og fara á markað í Japan. 

Japönsk túnfiskveiðiskip hafa m.a. stundað túnfiskveiðar  við mörk íslensku fiskveiðilögsögunnar og íslensk skip hafa einnig reynt túnfiskveiðar.