Foreldrar Shannon Dedrick söknuðu dóttur sinnar í sex daga áður en hún fannst. AP

Lögreglan í Flórída í Bandaríkjunum hefur fundið barn, sem hafði verið saknað í sex daga. Barnið fannst undir rúmi barnapíunnar.

Shannon Dedrick, sem er sjö mánaða gömul, fannst í kassa á heimili barnapíunnar Susan Baker, sem er skammt frá bænum Chipley. Lögreglan segist nú íhuga að leggja fram ákærur á hendur Baker, eiginmanni hennar og móður barnsins. Þetta kemur fram á fréttavef breska ríkisútvarpsins.

Það voru foreldrar barnsins sem höfðu samband við lögregluna á laugardag og lýstu eftir henni. Lögreglan leitaði í nærliggjandi skógi og á heimili foreldranna áður en hún heimsótti heimili barnapíunnar í gær.

Lögreglan segir að húsráðendur hefðu gefið leyfi til húsleitar og það varð til þess að barnið fannst í kassa undir rúmi. Búið var að ýta alls konar dóti að kassanum til þess að fela barnið að sögn lögreglu.

Shannon litla var flutt á sjúkrahús, en hún virðist heilsuhraust og hefur verið komið í umsjá barnaverndaryfirvalda.

Lögreglan hefur staðfest að í ágúst sl. hafi barnapían skrifað ríkisstjóra Flórída bréf þar sem hún heldur því fram að barninu hafi verið misþyrmt. Hún óskaði eftir aðstoð. Dómsskjöl sýna fram á að félagsmálayfirvöld í Flórída hafi rannsakað hvort barnið væri í mikilli hættu.

Þá staðfestir lögreglan einnig að Baker hafi verið yfirheyrð árið 2000 vegna máls frá árinu 1987, en þá hvarf þriggja ára gamall sonur þeirra í Suður-Karólínu. Baker sagði við lögregluna að hún hefði verið sofandi þegar barnið, sem hefur ekki fundist, hefði horfið.

Þá hlaut hún dóm fyrir alvarlega líkamsárás gegn sex ára gamalli stúlku í Suður-Karólínu árið 1987.