Ættingjar Nidal Malik Hasan majórs, sem skaut þrettán manns til bana og særði þrjátíu í árás í Fort Hood herstöðinni í Texas eru miður sín vegna tilræðisins. Hasan, sem er 39 ára geðlæknir, er sérhæfður í áfallstjórnum hermanna. Hann er er alvarlega særður á sjúkrahúsi.

Nader Hasan, náfrændi tilræðismannsins, hefur sent frá sér tilkynningu fyrir hönd fjölskyldu tilræðismannsins, sem birt er á vef The Washington Post. „Við erum í áfalli og sorgmædd vegna þessa skelfilega atviks á Fort Hood í dag (í gær). Við sendum fjölskyldum fórnarlambanna innilegar samúðarkveðjur."

Hasan segir að hann og frændi hans séu báðir fæddir í Bandaríkjunum og stoltir Bandaríkjamenn. Í viðtali við The New York Times segir hann að frændi hans hafi verið afar ósáttur við að hafa átt að fara til Íraks eða Afganistan. Hann hafi viljað gera hvað sem er til þess að vera laus undan því. Á Nidal að hafa leitað til lögfræðings til þess að fá ráð um hvernig hann gæti yfirgefið herinn áður en til brottfarar kæmi. 

Foreldrar Nidal eru Palestínumenn en þau eru bæði látin. Þau fluttu til Bandaríkjanna frá smábæ í nágrenni Jerúsalem.