Kanadískum 17 ára inúíta var í gær bjargað af ísjaka sem var á reki í Norðuríshafinu en á honum hafði hann félagsskap tveggja ísbjarna. Björgunarmenn stukku niður á jakann úr Herkúlesflugvél.

Unglingurinn fór til veiða ásamt sér eldri manni. Snjósleði þeirra bilaði og sneri unglingurinn við eftir hjálp. Hann rataði í ógöngur er ísinn brotnaði upp. Þar mátti hann dúsa í rúma tvo sólarhringa en frostið á nóttinni fór niður í 20 gráður.

Er mennirnir sneru ekki heim á umræddum tíma var lýst eftir þeim og hafin leit. Eldri maðurinn fannst skammt frá farartæki sínu og var kaldur mjög. Áhöfn björgunarflugvélar kom auga á unglinginn en misstu sjónar á honum er kvöldmyrkur gekk í garð.

Til hans sást aftur í gærmorgun og var 15 metra langur ísjakinn þá um 7 km undan ströndu og hafði rekið a.m.k. 45 km frá þeim stað sem hann brotnaði frá megin ísnum.

Hermenn stukku í fallhlíf niður á jakann unglingnum til aðstoðar. Kom þá í ljós að hann hafði lengstum haft félagsskap af tveimur húnum en móður þeirra hafði hann skotið í sjálfsvörn.

Unglingurinn var fluttur til bæjarins Coral Harbour við Hudsonflóa þar sem hann var meðhöndlaður við ofkælingu og kali.