Móðir grunaðs morðingja kom nýverið fram í sjónvarpi í Japan og sárbændi son sinn um að gefa sig fram við lögregluna. 

Þrítugur sonur konunnar, Tatsuya Ichihashi, er eftirlýstur vegna morðsins á 22 ára gamalli breskri kennslukonu, Lindsay Ann Hawker, sem fannst látin í baðkari á verönd íbúðar mannsins nærri Tókýó í mars 2007.

Samkvæmt upplýsingum frá lögreglunni hefur maðurinn farið í lýtaaðgerð til þess að breyta útliti sínu. Lögreglan hefur dreift myndun af manninum eins og hann er talinn líta út núna. Vísbendingar eru um að maðurinn hafi þar til í síðasta mánuði unnið við byggingavinnu í borginni Osaka í rúmt ár.

Haft er eftir vinnuveitanda hans þar að hann hafi verið að safna sér pening og spurst fyrir um hvernig hann gæti útvegað sér japanskan passa, sem bendir til þess að hann hyggist flýja land.

Fjölskylda hinnar látnu hefur ítrekað ferðast til Japans og tjáð óánægju sína með það að lögreglunni skuli ekki takast að hafa hendur í hári morðingjans. Lögreglan hefur hækkað þær fégreiðslur sem þeim er komið geti henni á spor morðingjans býðst.

Móðir Ichihashi kom fram í sjónvarpi og biðlaði til sonar síns um að gefa sig fram.

„Þetta er mamma, Tatsuya. Við pabbi þinn höfum ákveðið að tala um tilfinningar okkar, þrátt fyrir að við vitum að þér muni mislíka það,“ sagði konan meðal annars. Hún lýsti því hversu ánægð þau hjónin hefðu verið þegar þau heyrðu hversu iðinn sonur þeirra væri og fréttu af því að hann hefði tjáð vinnufélögum sínum að hann vildi vera foreldrum sínum góður sonur.

„Ef það er rétt, vertu þá svo góður að fara á lögreglustöðina í Gyotoku og segðu þeim sannleikann. Gerðu það,“ sagði konan snöktandi.

Stuttu eftir að yfirlýsing móðurinnar var send út handtók japanska lögreglan mann sem hún telur vera Tatsuya Ichihashi. 

„Við höfum handtekið mann í borginni Osaka, sem virðist vera sá sem leitað hefur verið í morðmáli,“ er haft eftir talsmanni rannsóknarlögreglunnar í Osaka. „Við vinnum nú að fá bera kennsl á manninn.“