Rússnesk lögreglufyrirvöld hafa handtekið átta meðlimi skipulagðs glæpahrings sem stundað hafa það að blekkja ungar stúlkur í kynlífsþrælkun á Ítalíu, Spáni og Grikklandi.

„Meðlimum glæpahringsins tókst að safna saman nokkur hundruðum stúlkum og senda þær ólöglega til útlanda þar sem þeim var gert að starfa við vændi,“ segir m.a. í yfirlýsingu sem rannsóknarnefnd í málinu hefur gefið frá sér.

Höfuðstöðvar glæpahringsins voru í borginni Kostroma, en var með starfsstöðvar í héruðum allt frá Moskvu til Kyrrahafsins. Leiðtogi hópsins var kona.

Samkvæmt heimildum ITAR-TASS fréttaveitunnar hjá rússnesku öryggisþjónustunni (FSB) hafa sex einstaklingar til viðbótar verið handteknir í öðrum löndum. Alls hafa því 14 verið handteknir vegna þessa máls og má þakka  það góðri samvinnu lögregluyfirvalda í viðkomandi löndum.

Ekki kom fram í hvaða löndum hinir sex höfðu verið handteknir, en vitað er að þeir eru rússneskir, úkraínskir og hvíta-rússneskir ríkisborgarar.

„Meðlimir glæpahringsins notuðu blekkingar og misnotuðu traust ungra kvenna sem flestar áttu það sameiginlegt að koma úr fátækum og félagslega illa stæðum fjölskyldum. Stúlkurnar voru sendar til Evrópu á ferðamannavísa,“ hefur ITAR-TASS eftir heimildamanni sínum hjá FSB.

Liðsmenn glæpahringsins mega búast við að verða ákærðir fyrir mansal og neyða konur í vændi. Hámarksrefsing fyrir slíka glæpi í Rússlandi er 23 ára fangelsi.

Sameinuðu þjóðirnar lýstu því yfir í síðasta mánuði að a.m.k. 270.000 fórnarlömb mansals voru í Evrópu og að í flestum tilvikum væri um að ræða konur sem þvingaðar væru til kynlífsþrælkunar.