BRUNO DOMINGOS

Bílsprengja sprakk utan við NATO-herstöð í Kabúl höfuðborg Afganistan með þeim afleiðingum að þrír erlendir hermenn særðust sem og þrír óbreyttir borgarar. Frá þessu er greint á vef breska ríkisútvarpsins. 

Skotmark sprengjunnar var herstöð sem nefnist Phoenix þar sem erlendar herdeildir þjálfa heimamenn. Talið er að skæruliðasveitir Talíbana standi að baki árásinni.

Ekki er langt síðan breskir ráðamenn töluðu í minnisblaði um að mögulegt væri að ná sáttum milli afganskra stjórnvalda og leiðtoga Talíbana innan næsta tveggja ára. Jafnframt hefur verið lögð aukin áhersla á að þjálfa heimamenn til að taka við hlutverki erlendra hermanna í því að halda uppi friði í landinu.

Breska ríkisútvarpið hefur komist yfir hluta minnisblaðsins, en í því  er bent á leiðir til þess að draga úr ófriði í landinu og þar með veita herliði NATO færi á því að yfirgefa landið. Meðal þess sem þar er lagt til er að leiðtogar Talíbana verði fjarlægðir af bannlistum Bandaríkjamanna á næstu sex mánuðum. Talið er að minnisblaðið sé eitt margra slíkra sem útbúin hafi verið fyrir Hamid Karzai, forseta Afganistan, sem býr sig nú undir að stjórna landinu enn eitt kjörtímabilið.

Gordon Brown, forsætisráðherra Bretlands, vísar því í samtali við breska ríkisútvarpið á bug að Bretar séu að undirbúa einhvers konar plan B í samskiptum sínum við Talíbana.  Hann tók hins vegar fram að Bretar styddu afganska ráðamenn í því að ná sáttum við Talíbana ef slíkt innibæri að Talíbanar létu af ofbeldisverkum sínum og tækju þess í stað virkan þátt í stjórnmálaumræðunni.

Jafnframt sagðist Brown vera vongóður um að honum myndi takast að sannfæra þjóðarleiðtoga aðildarríkja NATO um mikilvægi þess að senda 5.000 fleiri hermenn til Afganistans í því skyni að þjálfa heimamenn í hernaði.

Hamid Karzai AHMAD MASOOD

Gordon Brown ANDREW WINNING