Sjálfsmynd af Edvard Munch.

Verðmætu listaverki eftir norska málarann Edvard Munch var stolið í gærkvöldi úr galleríi í Ósló. Eigandi gallerísins segir við norsku fréttastofuna NTB að listaverkið sé metið á 2 milljónir norskra króna, jafnvirði 45 milljóna íslenskra króna.

Um er að ræða steinþrykk, sem nefnist Historien en svipað málverk hangir á vegg Óslóarháskóla. Munch gerði Historien á árunum 1914 og 1916 þegar hann var orðinn kunnur málari í Evrópu. Lögregla fékk tilkynningu á ellefta tímanum í gærkvöldi um að brotist hefði verið inn í galleríið Nyborg Kunst. Í ljós kom að verkinu hafði verið stolið en engu öðru.

Bíll, sem þjófarnir eru taldir hafa notað, fannst síðar mannlaus skammt frá galleríinu. Enginn hafði í morgun verið handtekinn. 

Norska Dagbladet hefur eftir sérfræðingi, að sennilega hafi verkinu verið stolið eftir pöntun.  

Árið 2004 ruddust grímuklæddir menn inn í Munch safnið í Ósló og höfðu á brott með sér tvö málverk eftir málarann, Ópið og Madonnu. Myndirnar komu í leitirnar tveimur árum síðar og fjórir menn hafa verið dæmdir fyrir aðild að ráninu.

Þá var þremur verkum eftir Munch stolið úr hóteli í Noregi árið 2005. 9 voru handteknir í kjölfarið og fimm ákærðir.