Réttarhöldin yfir Khalid Sheikh Mohammed, sem talinn er hafa skipulagt árásirnar á Bandaríkin 11. september 2001 og fjórum samverkamönnum hans, munu væntanlega vera í borgaralegum dómstól í nágrenni Tvíburaturnanna í New York.

Eric Holder, dómsmálaráðherra Bandaríkjanna, tilkynnti þetta í gærkvöldi. Hann sagði að saksóknarar myndu krefjast dauðarefsingar yfir Mohammed og félögum hans en þeir eru allir í haldi í fangabúðum Bandaríkjamanna við Guantanámo flóa á Kúbu. Verða þeir fluttir til New York til þess að mæta við réttarhöldin. 

„Eftir átta ára tafir munu þeir sem eru meintir ábyrgðarmenn hryðjuverkaárásanna 11. september loks svara til ábyrgðar," sagði Holder án þess að tiltaka hvaða dag réttarhöldin hefjast. 

Hann sagði að þeir yrðu  fluttir til New York til þess að svara fyrir þá glæpi sem þeir eru ákærðir fyrir í dómshúsi sem er einungis nokkrum húsalengjum frá þeim stað þar sem Tvíburaturnarnir stóðu, sagði Holder í gærkvöldi.

Fimm aðrir fangar í Guantanámobúðunum þurfa hins vegar að mæta fyrir herrétt. Meðal þeirra er Abd al-Rahim al-Nashiri, sem er ákærður fyrir að hafa skipulagt tilræðið sem eyðilagði bandaríska herskipið USS Cole við strendur Jemen árið 2000.

Herdómsstóllinn hefur verið harðlega gagnrýndur allt frá því George W. Bush, fyrrverandi forseti Bandaríkjanna, kom honum á seint á árinu 2001. Hann hefur hins vegar verið skipulagður upp á nýtt og njóta sakborningar meiri mannréttina en áður.

Gera má ráð fyrir að verjendur í réttarhöldunum í New York muni nú reyna að fá úrskurð um að vitnisburður sem fengist hefur með ólöglegum aðferðum í yfirheyrslum, eins og t.d. vatnspyntingum, sé ólöglegur en vitað er að Mohammed sætti slíkri meðferð.

Nær 3.000 manns létu lífið þegar 19 hryðjuverkamenn flugu farþegaþotum á Tvíburaturnana í New York og hús varnarmálaráðuneytisins í Washington auk þess sem ein vélin brotlenti í Pennsylvaníu.