Rudy Giuliani ásamt eiginkonu sinni Judith Reuters

Rudolph W. Giuliani, sem var borgarstjóri í New York þegar árásirnar voru gerðar á tvíburaturnana þann 11. september 2001, er lítið hrifinn af hugmyndinni um að rétta yfir Khalid Shaikh Mohammed, sem er talinn hafa skipulagt hryðjuverkin, í New York.

Á vef New York Times er haft eftir Giuliani að það að rétta yfir hryðjuverkamanninum og fjórum samverkamönnum hans fyrir borgaralegum rétti á Manhattan eigi eftir að kosta gríðarlegt fjármagn í öryggisgæslu. Þetta séu einnig skilaboð um að Bandaríkin eigi ekki í stríði gegn hryðjuverkum.

Giuliani sagði í dag að hann teldi að rétta ætti yfir mönnunum fyrir herrétti.

Giuliani, sem er fyrrum saksóknari, hlaut mikla almenna athygli á landsvísu í kjölfar hryðjuverkanna og hóf hann kosningabaráttu um að hljóta tilnefningu Repúblikanaflokksins sem forsetaframbjóðandi fyrir síðustu forsetakosningar. Hann hætti hins vegar fljótlega baráttunni en í dag sagði Giuliani  að hann myndi fljótlega tilkynna hvort hann hygðist gefa kost á sér sem ríkisstjóri New York en ríkisstjórakjör fer fram á næsta ári.