Barack Obama. KEVIN LAMARQUE

Öldungadeild Bandaríkjaþings undirbýr sig nú fyrir að halda atkvæðagreiðslu um viðamikið 2.000 blaðsíðna frumvarp demókrata um breytingar á ameríska heilbrigðiskerfinu.  60 atkvæði þarf af 100 í öldungadeildinni svo að frumvarpið fái að halda áfram til frekari þinglegrar meðferðar.

Greint er frá þessu á fréttavef BBC.

Demókratar, undir forystu þingmannsins Harry Reid sem er flutningsmaður frumvarpsins, þurfa því að tryggja sér atkvæði tveggja óháðra þingmanna, þar sem allir 40 repúblikanarnir í öldungadeildinni eru andsnúnir frumvarpinu. Demókratar þurfa ekki síður að fullvissa sig um eininguna innan sinna eigin raða, því að minnsta kosti þrír þeirra hafa lýst yfir efasemdum um frumvarpið.

Barack Obama, forseti Bandaríkjanna, hefur gert breytingar á heilbrigðiskerfinu að forgangsmáli í bandarískum stjórnmálum. Ef ekki tekst að koma frumvarpinu í gegnum þessa atkvæðagreiðslu og inn í þingumræður segja stjórnmálaskýrendur að það þýði ekki endilega endalok þess, en að það geti seinkað ferlinu umtalsvert fram á næsta ár.

Fulltrúadeildin, eða neðri deildin, samþykkti frumvarpið í svipaðri atkvæðagreiðslu með litlum mun fyrir skömmu síðan.

Næstu skref verða þau að 30. nóvember kemur öldungadeildin aftur saman eftir stutt hlé í kringum þakkargjörðarhátíðina. Þá verður frumvarpið rætt og væntanlega einhverjar breytingar á því lagðar til.

Að minnsta kosti þremur vikum síðar mun öldungadeildin greiða atkvæði um frumvarpið. Ef það fær samþykki verður sett upp samráðsnefnd á milli neðri og efri deildar þingsins til að sameina breytingar hvorrar deildar á frumvarpinu í eitt frumvarp. Að því loknu kjósa báðar deildir um frumvarpið. Ef það hlýtur samþykki þarf undirskrift Baracks Obama til þess að það taki gildi sem lög.