Að minnsta kosti 29 fórust þegar ferjan Dumai Express 10 sökk á Malacca sundi undan Riau eyjum í Indónesíu í gærmorgun. Farþegar hrópuðu af skelfingu og voru mikið sjóveikir meðan ofhlaðin ferjan kútveltist í öldurótinu og sökk síðan, að sögn þeirra sem af komust úr ferjuslysinu. 

Fólk sem bjargaðist sagði að hópar farþega sem hvergi voru skráðir á farþegalista hafi setið í þrengslum í ferjunni. Þeir hafna þeim skýringum skipstjórans að ferjan hafi farist vegna óveðursins. 

Amir Azli framhaldsskólakennari lýsti skelfingunni sem braust út um borð þegar sjórinn fór að fossa inn um göt á byrðingi ferjunnar. „Himininn var heiður og sjórinn sléttur egar við lögðum af stað, en veðrið versnaði á leiðinni,“ sagði Azli við AFP-fréttastofuna. „Það kom hellirigning og risastórar öldur og ferjan valt ofsalega.

Börnin grétu og konur, karlar og gamalt fólk var allt skelfingu lostið. Ég tel að meira en 350 manns hafi verið í skipinu. “

Lögeglustjórknn í Karimun sagði fréttamönnum að allt að því 400 manns kunni að hafa verið í ferjunni sem var 147 tonna skip. Hún hafði leyfi til að flytja 273 farþega og áhöfn. Ferjan sökk um hálftíma eftir að hún fór að leka, að sögn Johan Napitupulu skipstjóra ferjunnar.

Reuters fréttastofan lýsir hræðilegri bið farþeganna í sjónum eftir að ferjan sökk. Leitar- og björgunarlið bjargaði fjölda manns úr sjónum en talið er að minnsta kosti 29 hafi farist. Ferjuslys hafa verið tíð í Indónesíu.

Ferjan Dumai Express 10 var á leið frá borginni Batam til Dumai eyju.