Sarah Palin gaf nýverið út bók sem mikla athygli hefur fengið. REBECCA COOK

Sarah Palin, fyrrverandi varaforsetaefni, nýtur ekki vinsælda í Bandaríkjunum og á ekki möguleika á að verða kjörin forseti Bandaríkjanna. Þetta segir Gerald J. Austin, pólitískur ráðgjafi frá Bandaríkjunum, sem hélt fyrirlestur í dag í Háskóla Íslands.

Austin á langan feril að baki sem pólitískur ráðgjafi í Bandaríkjunum. Hann hefur t.d. starfað fyrir Jimmy Carter, fyrrverandi forseta Bandaríkjanna, þingmennina Gary Hart, Paul Tsongas, Carol Moseley Braun, Jesse Jackson og Barack Obama.

Talsverð athygli hefur beinst að Söruh Palin upp á síðkastið en nýkomin er út bók eftir hana þar sem hún fjallar um feril sinni og síðustu forsetakosningar, en hún var varaforsetaefni Johns McCains. Austin sagði að stuðningsmenn McCains hefðu vísað á bug ýmsu af því sem kemur fram í bókinni. Hann sagði að veruleg andstaða væri við hana innan Repúblikanaflokksins. Hún ætti sér vissulega stuðningsmenn inn flokksins en sá stuðningur væri ekki víðtækur.

Austin var á fyrirlestrinum spurður út í þá gagnrýni að Obama sýndi of mikla linkind í samskiptum við pólitíska andstæðinga sína. Hann sagði að sú gagnrýndi ætti vissulega rétt á sér. Obama hefði í mörgum málum rétt fram sáttarhönd og jafnvel boðið fram hina kinnina þegar hann hefði fengið yfir sig harða gagnrýni. Austin sagði að ekki hefði verið tekið vel í sáttatilraunir Obama og því mætti búast við að hann yrði harðari í sinni pólitík þegar liði á kjörtímabilið.

Austin sagði að Bandaríkjamenn gerðu sér grein fyrir að efnahagserfiðleikarnir í Bandaríkjunum væru ekki Obama að kenna, en þeir ætluðust til þess að hann lagaði það sem úrskeiðis hefði farið og það strax. Hann sagði að staða efnahagsmála í Bandaríkjunum væri mjög erfið. Atvinnuleysi nú væri það mesta síðan á kreppuárunum á þriðja áratug síðustu aldar. Pólitísk framtíð Obama réðist að miklu leyti af því hvernig tækist að vinna bug á vanda efnahagslífsins.

Austin sagði að einstök stemming hefði skapast í kringum kjör Obama. Um tvær  milljónir manna hefðu verið viðstaddar þegar hann var settur inn í embætti. Honum hefði tekist að virkja ungt fólk til þátttöku í kosningabaráttunni sem hefði átt stóran þátt í að tryggja kjör hans. Reynslan sýndi að pólitísk velgengni væri stundum skammvin. Það væri óljóst hvernig staðan yrði á miðju kjörtímabili þegar kosið verður til þingsins, en í dag hafa demókratar meirihluta í báðum deildum þingsins.