Réttarhöld yfir John Demjanjuk, fyrrverandi fangaverði í útrýmingarbúðum nasista í seinni heimstyrjöldinni í Sobidor í Póllandi eru hafin í München í Þýskalandi. Honum er gefið að sök að hafa átt þátt í að myrða að minnsta kosti 29 þúsund gyðinga í Sobibor. Í fangabúðunum voru 250 þúsund manns tekin af lífi á einu og hálfu ári.

Demjanjuk var keyrður inn í réttarsalinn í hjólastjól en fjölskylda Demjanjuk segir að hann sé alvarlega veikur. Var hann með lokuð augun en greinilega með meðvitund, að sögn fréttamanna sem fylgjast með réttarhöldunum.

Demjanjuk var framseldur frá Bandaríkjunum fyrr á árinu til Þýskalands. Þetta er ekki í fyrsta sinn, sem sótt er að Demjanjuk. Hann var framseldur frá Bandaríkjunum til Ísraels fyrir 23 árum. Honum var gefið að sök að hafa starfað í Treblinka-fangabúðunum og hlotið viðurnefnið Ívan grimmi. Þar var hann dæmdur til dauða, en ný gögn komu fram í málinu til vitnis um að hann væri ekki Ívan grimmi og hæstiréttur Ísraels hnekkti dauðadóminum. Demjanjuk var látin laus og fór aftur til Bandaríkjanna, að því er fram kom í grein Karls Blöndal í Morgunblaðinu fyrr á árinu.

Demjanjuk fæddist í Úkraínu árið 1920 og var skírður Ívan. Þegar hann var tvítugur var hann kvaddur í rauða herinn. Vorið 1942 var hann tekinn til fanga og um sumarið gaf hann kost á sér til starfa á vegum SS-sveita nasista. Hann hlaut þjálfun í Trawnik-fangabúðunum eins og um fimm þúsund menn, sem hjálpuðu nasistum við þjóðarmorðið á gyðingum og kallaðir voru trawnikar. Eftir þjálfunina varð hann vaktmaður á vegum SS-sveitanna. Hann starfaði í tveimur alræmdustu gereyðingarbúðum nasista, Majdanek og Sobibor í Póllandi. Þegar stríðinu lauk starfaði hann í fangabúðunum í Flossenbürg í Þýskalandi.

Demjanjuk var skráður í hóp þeirra fjölmörgu, sem voru á vergangi í stríðslok, og starfaði fyrir Bandaríkjamenn í ýmsum flóttamannabúðum í Suður-Þýsklandi til 1951. Árið 1952 sigldi hann til Bandaríkjanna ásamt konu og barni og kvaðst hafa verið stríðsfangi í stríðinu. Sex árum síðar varð hann bandarískur ríkisborgari og tók sér nafnið John.

Árið 1977 hóf bandaríska dómsmálaráðuneytið hins vegar málaferli gegn Demjanjuk fyrir að hafa veitt rangar upplýsingar þegar hann varð ríkisborgari og 1981 missti hann ríkisborgararéttinn.