Ítalski fáninn ber ekki tákn kristinna manna í núverandi mynd.

Ítalskur ráðherra lagði til í dag að krossi yrði bætt við ítalska þjóðfánan, þar sem hið kristna tákn væri hluti af sönnum einkennum Evrópu. “Ég trúi því að Evrópa hafi rétt á því að gangast við einkennum sínum sem við virðumst óðum vera að glutra niður,” sagði Robetro Castelli, ráðherra samgöngumála.

Castelli er meðlimur í Norðursambandinu, samstarfsflokki Silvio Berlusconi í ríkisstjórn, sem hefur lýst sig andsnúinn innflytjendum til landsins. Castelli tjáði sig líka um þjóðaratkvæðagreiðsluna gegn bænaturnum í Sviss og sagði að “því miður sætum við hörðum árásum gagnvart einkennum okkar af umburðarlitlum trúarbrögðum eins og Íslam”.

Fyrr í þessum mánuði úrskurðaði Mannréttindadómstóll Evrópu að notkun krossa í ítölskum skólastöðum bryti gegn réttindum þeirra foreldra sem vilja mennta börn sín samkvæmt eigin trúarsannfæringu og gegn réttindum barna til trúfrelsis.  

Skoðanakönnun í kjölfarið sýndi hinsvegar að 84% ítölsku þjóðarinnar væri hlynnt því að krossar hangi uppi í skólum.

Í kjölfar tillögu Castelli benti utanríkisráðherra Ítalíu, Franco Frattini, á að 9 Evrópuþjóðir notuðust nú þegar við krossinn sem tákn í þjóðfánum sínum. Þar á meðal er auðvitað þjóðfáni Íslands.

Þingmaðurinn Gianfranco Fini lýsti því hinsvegar yfir að tillagan væri “truflandi og lyktaði af lýðskrumi.”