Blóðgjöf. Mynd úr safni. mbl.is/Kristinn

Frá og með fyrsta mars nk. mega samkynhneigðir Svíar gefa blóð, en hingað til hafa blóðgjafir homma og lesbía verið bannaðar. Að sögn heilbrigðisyfirvalda í Svíþjóð mega þó samkynhneigðir karlar ekki gefa blóð nema þeir geti sýnt fram að þeir hafi ekki haft samfarir við aðra karlmenn í eitt ár.

„Karlmenn sem hafa haft samfarir við aðra karlmenn verður ekki lengur bannað til frambúðar að gefa blóð,“ segir í yfirlýsingu frá heilbrigðisyfirvöldum, sem var birt í dag á Alþjóðlegum baráttudegi gegn HIV smiti.

Þá segir að kynhneigð fólks muni ekki lengur ráða því hvort einstaklingur geti gefið blóð eður ei. Nú verði hins vegar skoðað hvort viðkomandi blóðgjafi hafi stundað áhættusamt kynlíf, ef svo er verður hægt að banna þeim einstaklingum að gefa blóð í eitt ár. Fram kemur að karlmenn sem stunda kynlíf með öðrum karlmönnum tilheyri þeim hópi.

Þeir sem vilja gefa blóð verða að fylla út langan lista þar sem spurt er um heilsufar viðkomandi og kynlíf. Að því loknu verða einstaklingarnir metnir hvort þeir séu hæfir til þess að gefa blóð. Í framhaldinu verða gerðar rannsóknir á blóðinu áður en það verður notað.

Samkynhneigðir eru sagðir tilheyra hópi fólks sem á í meiri hættu en aðrir hópar að smitast af HIV-veirunni, sem veldur alnæmi, og lifrabólgu. Báðir sjúkdómarnir geta smitast manna á milli við samfarir.

Talsmaður heilbrigðisyfirvalda segir að nú þegar hafi nokkur önnur Evrópulönd aflétt banni við blóðgjöf samkynhneigðra.