Einn virtasti veðurfræðingur í Kína varar við því að öfgaveðurbreytingar muni geta valdið ómetanlegum skaða, en segir jafnframt að Kínverjar verði að aðlaga sig að loftlagsbreytingum frekar en að reyna að stöðva þær.

„Hlýnun jarðar er staðreynd. Fyrir stórt land eins og Kína er hagkvæmara og mikilvægara að venja sig að breyttum aðstæðum í stað þess að reyna að vinna á móti þróuninni,“ segir Zheng Guoguang, yfirmaður Veðurathugunarstjórnar Kína.

Ummæli Zheng falla í grein sem hann skrifaði í tímariti Kommúnistaflokksins þar í landi sem nefnist Leitin að sannleikanum. Greinin birtist aðeins örfáum dögum áður en loftlagsráðstefna Sameinuðu þjóðanna á að hefjast í Kaupmannahöfn, en margir höfðu bundið vonir við að Kínverjar myndu gegna lykilhlutverki á þeim fundi. 

Kínverjar hafa haft það að opinberu markmiði bæði að hægja á loftlagsbreytingum og aðlagast breyttum aðstæðum. Í grein sinni lýsir Zheng hugsanlegum afleiðingum loftlagsbreytinganna. Hann áætlar þannig að samdráttur í kornræktun geti numið 37% á næstu áratugum ef ekkert verði að gert til þess að bregðast við breyttum aðstæðum. Svo mikill samdráttur í framleiðslu myndi, að hans sögn, ógna fæðuöryggi landsins.

„Komi afleiðingar loftlagsbreytinganna fram tvisvar eða oftar á næstu fimm árum, sem getur t.d. birst í miklum þurrkum í tvö til þrjú ár, þá gæti það haft óútreiknanleg áhrif á efnahag landsins og samfélagsþróun,“ skrifar Zheng, sem situr í nefnd sem mótar stefnu stjórnvalda í loftlagsmálum.

Hann telur mikilvægt að Kínverjar bregðist við hugsanlegum áhrifum loftlagsbreytinga til þess að draga úr skaðlegum áhrifum þeirra. Sem lið í því hvetur hann stjórnvöld til þess að auka kornbirgðir þjóðarinnar, auka framleiðsluna og bæta varnir ræktarlands og vatnsbóla.

Kína er eitt þeirra landa í heimi sem losar hvað mest af gróðurhúsalofttegundum. Í síðustu viku tilkynntu kínversk stjórnvöld að þau hygðust draga úr losun. Þrátt fyrir að Kínverjar skilgreina sig sem fórnarlamb loftlagsbreytinga þá hafa kínversk stjórnvöld þráast við að minnka losun sína jafn mikið og Sameinuðu þjóðirnar hafa kallað eftir. Kínversk stjórnvöld kenna Vesturlöndum helst um loftlagsbreytingarnar og telja að þróuðu ríkin eigi að því að bera meginþungann af kröfunni um minni losun.