Sjálfsmorðssprengja í Mógadishu, höfuðborg Sómalíu, varð að minnsta kosti átján manns að bana, þeirra á meðal eru þrír ráðherrar landsins. Sprengingin varð á hóteli í borginni þar sem verið var að útskrifa 43 stúdenta frá Banadirháskóla. Þetta kemur fram á vef breska ríkisútvarpsins.

Nákvæmar fregnir af sprengingunni eru enn sem komið er fremur óljósar, en einn sjónarvotta segir allt benda til þess að árásinni hafi verið beint gegn þeim fulltrúum stjórnvalda sem til staðar voru á Shamo hótelinu.

Sprengingin virðist hafa átt sér stað í samkomusal hótelsins, þar sem hundruðir manna voru saman komnar til þess að fagna útskriftinni. Lítil sem engin öryggisgæsla var í samkomusalnum þar sem allir lífverðir ráðherranna biðu frammi á gangi.

Alls voru fimm ráðherrar staddir á hótelinu þegar atvikið átti sér stað og nú er ljóst að þrír þeirra létu lífið í sprengingunni. Þeirra á meðal eru Qamar Aden Ali heilbrigðisráðherra, Ahmed Abdulahi Waayeel menntamálaráðherra og Ibrahim Hassan Addow ráðherra æðri mennta. Einnig eru tveir blaðamenn meðal látinna.

Margir útlendingar dvelja á Shamo hótelinu. Þeirra á meðal eru erlendir hjálparstarfsmenn, blaðamenn og þeir diplómatar sem enn leggja leið sína til Mógadishu. Hótelið er staðsett í þeim litla hluta borgarinnar sem stjórnvöld ráða yfir, aðeins í um eins kílómetra fjarlægð frá herstöð Sameinaða friðargæsluliðs Afríku í Sómalíu.

Enginn hefur enn lýst yfir ábyrgð á sprengingunni, en Íslamistar hafa löngum átt í útistöðum við stjórnvöld landsins sem njóta stuðnings Sameinuðu þjóðanna.