Loftslagsráðstefna Sameinuðu þjóðanna er komin á fullt skrið í Kaupmannahöfn. Það eru þó ekki allir á eitt sáttir um mikilvægi hennar. Forstöðumaður hugveitunnar Copenhagen Consensus Centre segir að verið sé að eyða miklum peningum fyrir lítið í baráttunni við losun gróðurhúsalofttegunda.

Danski prófessorinn Björn Lomborg er nú staddur á ráðstefnunni. Hann segir að það sé mjög kostnaðarsamt að draga úr losun koltvísýrings, því sú tækni sem menn ráði yfir í dag sé einfaldlega ekki nógu góð. „Við eyðum því miklum fjármunum í losun gróðurhúsalofttegunda, sem hefur litla þýðingu fyrir framtíðina,“ segir hann.

Bandarísk yfirvöld einblíndu hins vegar á samdrátt í losun koltvísýrings  á ráðstefnunni í dag. Umhverfisstofnun Bandaríkjanna greindi í gær frá skrefum sem bandarísk stjórnvöld hyggjast stíga til að draga úr losun gróðurhúsalofttegunda án samþykkis Bandaríkjaþings. 

„Í byrjun ársins 2011 munu þeir sem losa mikið af gróðurhúsalofttegundum senda frá sér gögn, sem verða opinber, sem mun gera okkur kleift að fylgjast með því hvaðan losunin komi. Þetta þýðir jafnframt að við getum komið á loftslagsrástefnuna í Kaupmannahöfn með skýrt dæmi um hvað við séum reiðbúin að gera í baráttunni við þennan alþjóðlega vanda,“ segir Lisa Jackson, yfirmaður bandarísku umhverfisstofnunarinnar.

Lomborg á hins vegar ekki von á því að ráðstefnan muni leiða til þess að menn beiti réttum aðferðum í baráttunni. Hann segir að þetta sé ekki í fyrsta sinn sem þjóðarleiðtogar lofa því að draga úr losun gróðurhúsalofttegunda. Það hljómi afar vel, en hann bendir á menn hafi lofað öllu fögru á ráðstefnunum í Rio de Janeiro í Brasilíu árið 1992 og í Kyoto í Japan 1997. „Við höfum ekki staðið við gefin loforð,“ segir Lomborg. 

Þjóðarleiðtogar ríkjanna 192 munu mæta á ráðstefnuna í næstu viku.