Svisslendingar samþykktu í þjóðaratkvæðagreiðslu að banna byggingu fleiri bænaturna múslíma, mínaretta, í landinu Reuters

Svissneskur kaupsýslumaður hefur látið breyta reykháf á húsi í sinni eigu í bænaturn. Segist hann hafa gert þetta í mótmælaskyni við niðurstöðu nýlegrar þjóðaratkvæðagreiðslu í Sviss þar sem meirihluti landsmanna samþykkti bann við byggingu bænaturna múslíma í landinu.

„Það var hneyksli að Svisslendingar skyldu greiða atkvæði um slíkt bann. Í framhaldinu njótum við stuðnings allra öfgahægriflokka í Evrópu. Þetta er skammarlegt,“ segir Guillaume Morand, kaupsýslumaður sem á keðju skóverslana í Sviss.

Kaupsýslumaðurinn, sem sjálfur er ekki múslimi, segist hafa látið útbúa eftirlíkingu af bænaturni á hús sitt í borginni Lausanne í vesturhluta Sviss í mótmælaskyni auk þess sem hann vilji „senda friðarboð.“

Það var Svissneski þjóðarflokkurinn (SVP), stærsta stjórnmálafylking landsins, sem lagði tillögu um byggingabann bænaturna fram fram en SVP er hægriflokkur. Alls samþykktu  57% landsmanna bannið.

Að mati Morand börðust stjórnmálamenn annarra flokka í Sviss ekki nægilega harkalega á móti hugmyndinni um bannið.

„Þeir voru andvígir banni, en útskýrðu ekki nægilega vel fyrir landsmönnum hvers vegna,“ segir Morand og bendir á að í aðdraganda þjóðaratkvæðagreiðslunnar hafi aðeins mátt sjá plaköt frá SVP.

Að mati Morands er bannið hneyksli í ljósi þess að svissnesk stjórnvöld hvetji íbúa Arabalanda óspart til þess að „sækja landið heim og eyða fjármunum sínum í Sviss.“