Þrír franskir ferðamenn gætu hlotið allt að fimm ára fangelsi í Brasilíu vegna þátttöku sinnar í óeirðum og slagsmálum um borð í farþegaflugvél. Að sögn franska ræðismannsins í Brasilíu hafa tveir karlmenn á sjötugsaldri og kona á sextugsaldri verið kærð fyrir að stofna lífi annarra flugfarþega í hættu.

„Þetta er mjög alvarlegar ásakanir,“ er haft eftir ríkiserindreka sem ekki vill láta nafn síns gerið. Tók hann fram að unnið væri í því að fá þremenningana látna lausa gegn tryggingu.

Fólkið var handtekið sl. mánudag í kjölfar deilna þess við flugfreyjur um borð. Flugvélinni, sem var á leið frá Sao Paulo til Parísar, hafði seinkað um marga klukkutíma vegna tæknilegra örðugleika, en verið var að búa flugvélina undir flugtak þegar deilurnar brutust út.

Um borð var tuttugu manna hópur franska eldriborgara, sem dvalið hafði í Brasilíu í um tvær vikur og var nú á leið heim á ný. Hópnum leist illa á að fljúga ætti vélinni eftir þær bilanir sem orðið hafði að gera við um borð og krafðist þess að fá að fljúga með annarri flugvél.

Þess er að minnast að ekki er nema rúmt hálft ár síðan flugvél frá Air France hrapaði í sjóinn á leið sinni frá Brasilíu til Frakklands með þeim afleiðingum að allir um borð, 228 farþegar og áhöfn, létust.

Sylvain Itte, ræðismaður Frakklands í Brasilíu, heimsótti nýverið karlmennina tvo en þeir eru vistaðir í þröngum fangaklefa ásamt 30 öðrum föngum, en konunni er haldið í sér geymslu.

Ræðismaðurinn hefur fullvissað dómarann í málinu um að þremenningarnir muni dvelja í Brasilíu á hans ábyrgð þar til málið verði dómtekið. Hann kvartaði jafnframt yfir því að brasilísk yfirvöld skyldu ekki hafa látaið hann tafarlaust vita af handtökunni og að honum hafi fyrst í stað verið meinað að hitta þremenningana.