Fulltrúar fimmtíu Afríkuríkja sem þátt taka í loftlagsráðstefnu Sameinuðu þjóðanna í Kaupmannahöfn munu í dag kynna tillögur sínar um fjármögnun baráttunnar gegn loftlagsbreytingum. Þetta kemur fram á vef danskra dagblaðsins Politiken.

Samkvæmt því sem þar kemur fram munu tillögurnar fela í sér að ríkustu lönd heims, Evrópusambandslöndin og Bandaríkin, eigi að greiði fátækustu löndum heims, sem glíma við verstu afleiðingar loftlagsbreytinganna, 5% af vergri þjóðarframleiðslu sinni.

Til samanburðar má nefna að í dag greiðir Danmörk 0,8% af vergri landsframleiðslu sinni til þróunaraðstoðar í fátækustu löndum heims, en upphæðin nam 14,5 milljörðum danskra króna á síðasta ári eða sem samsvarar 356 milljörðum íslenskra króna.

Í tillögum fulltrúa Afríkuríkjanna er gert ráð fyrir að a.m.k. helmingurinn af fyrrgreindum 5% verði eyrnamerktur baráttunni gegn loftlagsbreytingum í þróunarríkjum. Einnig fara þeir fram á að ríkustu lönd heims leggi fram 400 milljarða bandaríkjadala til málefnisins nú þegar til þess að hægt verði að bregðast við auknum þurrki víða um heim, flóð og fellibylja sem rekja má til loftlagsbreytinga.

Þetta er umtalsvert hærri upphæð en Sameinuðu þjóðirnar hafa lagt til, en þar hefur verið talað um að ríkustu lönd heims leggi reiði fram 10 milljarða bandaríkjadala ár hvert á árunum 2010-2012.

Fulltrúar Afríkuríkjanna krefjast þess einnig að ríku lönd heims minnki losun gróðurhúsalofttegunda um 52% fram til ársins 2017 og um 65% fyrir árið 2020  samanborið við losun 1990.

Talsmenn Evrópusambandsríkjanna hafa þegar lofað að minnka losun ESB-landanna um 20% fram til ársins 2020, meðan Bandaríkjamenn hafa aðeins sagt munu minnka losun um 4% fram til sama árs.