Nicolas Sarkozy Frakklandsforseti greindi frá því í dag að Frakkland muni slá lán til að fjármagna 35 milljarða evru innspýtingu í efnahaginn með því markmiði að efla samkeppni og styrkja háskóla. „Við verðum í dag að búa Frakkland undir áskoranir morgundagsins svo að landið okkar geti nýtt sér batann til hins ýtrasta, svo það geti orðið sterkara og samkeppnishæfara, svo það bjóði upp á fleiri störf,“ sagði Sarkozy.

Hann fullyrti að með því að taka að láni og sprauta út í efnahaginn 35 milljörðum evra myndi Frakkland framleiða andvirði 60 milljarða evra í fjárfestingum bæði í ríkis- og einkaeigu og komast út úr hinni árslöngu kreppu með sterkari stöðu en áður.

Fjármagninu verður að stórum hluta veitt í starfsþjálfun, rannsóknir, iðnað og smáfyrirtæki að sögn Sarkozy, en stærstur hluti þess, 11 milljarðir evra, fer til háskólanna. "Markmið okkar er einfalt. Við viljum bestu háskóla í heimi," sagði Sarkozy í sjónvarpsávarpi frá Elysse höll í dag. Nú þegar mun ríkið veita milljarði evra til byggingar á nýju háskólasvæði í Saclay, úthverfi Parísar. Átta milljörðum verður veitt í rannsóknir.

13 milljarðir evra af 35 verða sóttir til endurgreiddra lána sem veitt voru frönsku bönkunum í upphafi kreppunnar en hinir 22 milljarðarnir verða fjármagnaðir á markaði. Fyrirætlanir Frakka hafa hinsvegar mætt mótstöðu í Brussel, þar sem Evrópusambandið hefur beðið Frakka um að ná fjárlagahallanum niður í 3% af vergri ársframleiðslu fyrir árið 2013. Hallinn stefnir nú í að ná 8,5% á næsta ári. 

Sarkozy segir hinsvegar að ríkisstjórnir Frakklands hafi í gegnum tíðina stöðugt fórnað fjárfestingum sínum og það séu mistök. "Við höfum tapað hlutdeild okkar á markaði, ekki til vaxandi landa eins og Brasilíu, Indlands eða Kína, heldur til nágranna okkar í Evrópu." Frönsk fyrirtæki, sérstaklega á sviði bílaframleiðslu, geimtækni, lesta- og skipasmíða, munu fá 6,5 milljarða evra til að ná aftur forskoti sínu á markaði og efla útflutning.