Forseti Kína, Hu Jintao, er nú í opinberri heimsókn í Túrkmenistan til að opna lokaáfangann í gaslínu sem flytja á gas frá Mið-Asíu. Opnun leiðslunnar er stór áfangi í áætlun Kína til að tryggja sér orku.

Leiðtogar bæði Túrkmenistan og Kína verða viðstaddir athöfnina í dag auk leiðtoga Úzbekistan og Kazakhstan, en gasleiðslan liggur einnig um þau lönd. Fréttaritari BBC í Asíu segir að nýja leiðslan brjóti á bak aftur langvarandi yfirráð Rússa í sölu á gasi og marki því upphaf nýrra tíma í flutningi hinna gríðarmiklu orkuauðlinda Mið-Asíu til austurs.  

Gasleiðslan, sem lögð er af kínversku orkuveitunni China National Petroleum Corporation, liggur alls um 1.800 kílómetra leið frá Túrkmenistan til Xinjian í vesturhluta Kína. Með opnun hennar verða lönd Mið-Asíu ekki eins háð Rússlandi um kaup á orku og þau hafa verið.

Túrkmenistan tilheyrði áður Sovétríkunum. Landið er ríkt af orkulindum og er talið hafa einhverjar stærstu gaslindir í heiminum, en nánast allt gasið hefur verið flutt til Rússlands í gegnum gamlar sovéskar gasleiðslur.

Sprengja varð í einum þessara leiðsla fyrr á þessu ári sem leiddi til deilna yfirvalda í Túrkmenistna við rússneska orkurisann Gazprom sem lokaði nánast alfarið fyrir útflutningi gassins.