Teymi fornleifafræðinga segjast nú hafa í fyrsta skipti fundið hluta úr líkklæðum frá tímum Jesú Krists í grafhýsi í Jerúsalem. Vísindamennirnir, sem eru frá Hebreska háskólanum sem og bandarískum og kanadískum stofnunum, segja að klæðið sé afar ólíkt hinu umdeilda Tórínó-klæði sem sem sumir telja að hafi verið líkklæði Krists en aðrir segja falsað.

Líkklæðið sem nú hefur fundist er einfaldara að gerð en Tórínó-klæðið að sögn vísindamannanna. Líkami manns sem vafinn hafði verið í klæðin fannst í grafhýsi sem talið er að sé frá þeim tímum sem Kristur er sagður hafa verið uppi, við gamla borgarhluta Jerúsalem.
Grafhýsið er hluti af grafreit sem nefnist Blóðvöllurinn en þar er Júdas Ískariot talin hafa svipt sig lífi. Vísindamennirnir telja að líkið sé af manni sem hafi verið háttsettur Gyðingaprestur eða meðlimur efri stéttarinnar. að hann hafi dáið úr holdsveiki og sé þar með elsta staðfesta tilfelli þess sjúkdóms sem fundist hefur.

Þeir telja að hið einfalda líkklæði sé dæmigert fyrir líkklæði frá þessum tíma í mannkynssögunni og draga því þá ályktun að þar sem Tórínó-líkklæðið sé svo gjörólíkt geti það ekki verið líka frá 1. öldinni í Jerúsalem.
Fyrir 20 árum þóttu rannsóknir sýna að efnið í Tórínó-líkklæðinu væri frá miðöldum, en þeir sem á það trúa telja að á því sjáist andlit Krists.