Skiltið þar sem hefur staðið í Auschwitz síðan í seinni heimsstyrjöld. PETER ANDREWS

Ránið á skiltinu við Auschwitz útrýmingarbúðirnar í Póllandi í dag hefur vakið gífurlega reiði meðal Gyðinga um allan heim. Shimon Peres hefur lýst því yfir að Gyðingum sé „verulega brugðið" vegna atburðarins. Peres átti einkafund með forsætisráðherra Póllands, Donald Tusk, á ráðstefnunni í Kaupmannahöfn í dag og hafa þeir báðir fordæmt ránið.

„Þetta skilti á sér djúpa sögulega merkingu fyrir bæði Gyðinga og aðra sem tákn fyrir þá rúmu milljón manna sem dóu í Auschwitz," sagði Peres. „Ísraelsríki og hið alþjóðlega samfélag Gyðinga biðlar til ykkar um að gera allt hvað þið getið til að finna glæpamennina og skila skiltinu aftur á sinn stað."

Stjórnandi helfararsafnsins Yad Vashem í Jerúsalem fordæmdi einnig stuldinn á skiltinu alræmda í dag og sagði hann jafngilda stríðsyfirlýsingu. „Við vitum ekki hverjir hinir seku eru en getum gert ráð fyrir því það séu nýnasistar," sagði hann í yfirlýsingu. „Þessir menn vilja færa Evrópu 70 ár aftur í tímann til hinna myrku ára dauða og eyðileggingar."

Járnskiltið var smíðað af föngum útrýmingarbúðunum að skipan fangavarða nasista. Á því stóð „Arbeit macht frei" eða „Vinnan mun frelsa þig" og þykir það eitt andstyggilegasta dæmið um áróður nasista. Fréttirnar um stuldinn hafa vakið mikinn óhug um allt Pólland.