Gestir sjást hér undir skiltinu alræmda sem þjófar tóku ófrjálsri hendi í nótt. Reuters

Búið er að stela hinu alræmda skilti sem hékk yfir aðalhliðinu að Auschwitz fangabúðum nasista í Póllandi. Lögreglan leitar nú að þjófunum, en málmskiltið var tekið ófrjálsri hendi í nótt.

Þetta er í fyrsta sinn sem einhver hefur stolið skiltinu. Fangar bjuggu það til og það var sett upp snemma á fimmta áratug síðustu aldar. Á því stendur „Arbeit Macht Frei“, sem þýðir „Vinnan mun frelsa þig“.

Rúm ein milljón manna lét lífið í fangabúðunum á tímum seinni heimsstyrjaldarinnar. Um 90% þeirra voru gyðingar.

Pawel Sawicki, sem starfar við Auschwitz safnið, segir þetta vera hræðilegt. „Skiltið segir allt. Það er ták fyrir það sem Auschwitz stóð fyrir. En staður þar sem mörg hundruð þúsund einstaklingar dóu skiptir greinilega engu máli í augum þjófanna,“ segir Pawel í samtali við BBC.

Hann telur að þjófnaðurinn hafi verið skipulagður.

Búið er að setja upp eftirmynd af skiltinu á meðan þjófanna er leitað.