Barack Obama, forseti Bandaríkjanna, sagði þegar hann ávarpaði leiðtoga á loftslagsráðstefnu Sameinuðu þjóðanna í Kaupmannahöfn í dag, að þeir verði að fallast á samkomulag um að draga úr losun gróðurhúsalofttegunda þótt það samkomulag væri ekki fullkomið.

„Málið snýst núna um hvort okkur mun miða fram á veginn eða hvort við munum sundrast," sagði Obama. „Þetta er ekki fullkomið samkomulag og ekkert ríki fær allt sem það vill," sagði hann samkvæmt útskrift af ræðunni, sem dreift var til fréttamanna.

Hann sagði, að ef engin niðurstaða fengist á ráðstefnunni í Kaupmannahöfn, sem á að ljúka í dag, endurspegli það sömu flokkadrættina, sem hafa komið í veg fyrir raunhæfar aðgerðir í loftslagsmálum undanfarin ár. 

„Við munum halda áfram sömu deilunum mánuð eftir mánuð, ár eftir ár og á meðan vex hættan, sem steðjar að heiminum, þangað til of seint er að grípa til aðgerða."