Ben Nelson þingmaður Demókrata talar við blaðamenn eftir að hann hafði gert upp hug sinn til frumvarpsins. JONATHAN ERNST

Ben Nelson, þingmaður Demókrata í öldungadeild Bandaríkjaþings, hefur lýst því yfir að hann ætli að styðja frumvarp Obama forseta um breytingar í heilbrigðismálum. Þetta er talið auka verulega líkur á að frumvarpið verði samþykkt í öldungadeildinni.

Demókratar þurfa 60 atkvæði til að tryggja framgang frumvarpsins í öldungadeild. Nelson hafði lýst áhyggjum af því að með frumvarpinu væri verið að nota skattfé ríkisins til að fjármagna fóstureyðingar. Yfirlýsing Nelsons kemur í kjölfar 13 tíma viðræðna sem hann átti við stuðningsmenn frumvarpsins í hans eigin flokki.

Stefnt er að því að atkvæði verði greidd í öldungadeildinni um frumvarpið nk. mánudag. Frumvarpið verður ekki að lögum fyrr en fulltrúadeildin er búin að samþykkja þær breytingar sem öldungadeildin gerði á frumvarpinu.

Barack Obama forseti hefur lagt mikla áherslu á að frumvarpið verði að lögum fyrir lok þessa árs. Líkur á að það takist hafa nú aukist þar sem búist er við að allir þingmenn Demókrata í öldungadeild muni styðja frumvarpið. Mikil andstaða er við frumvarpið í Repúblikanaflokknum, en þingmann hans hafa gert allt sem þeir geta til að tefja afgreiðslu þess.

„Nú er orðið ljóst að meirihluti í öldungadeildar vill standa gegn þrýstingi tryggingafyrirtækjanna og samþykkja umbætur í sjúkratryggingakerfinu sem við höfum beðið eftir í margar kynslóðir,“ sagði Obama í dag.

Barbara Boxer, þingmaður Demókrata í öldungadeild, sagði að sú niðurstaða sem nú væri fengin myndi setja skýr skil á milli opinbers stuðnings við fóstureyðingar og þess fjármagns sem notendur þjónustunnar greiddu sjálfir. Boxer hefur barist fyrir rétti kvenna til fóstureyðinga.