Sagt er frá átökum lögreglu og mótmælanda á vefsíðunni Kalame.org.

Írönskum öryggissveitum lenti saman við andstæðinga ríkisstjórnar Mahmouds Ahmadinejads Íransforseta síðdegis í írönsku borginni Qom í dag en þá fór fram útför andófsklerksins Hossein Ali Montazeri. Íransstjórn reynir að loka fyrir erlendan fréttaflutning sem torveldar umfjöllun um atburði dagsins.

Fram kemur í skeyti AFP-fréttastofunnar að samkvæmt vefnum kalome.org hafi mótmælendur grýtt öryggissveitir fyrir utan heimili klerksins í Qom en hann féll frá á laugardag, á 88. aldursári.

Montazari fór ekki leynt með gagnrýni sína á margt í stjórnarfari landsins en hann var þeirrar skoðunar að íranska byltingin fyrir 30 árum hefði snúist upp í andhverfu sína enda ríkti einræði í skjóli íslamstrúar.

Grannt er fylgst með þróun mála í Íran næstu klukkustundirnar en stjórnin er sögð óttast að dauði Montazeri verði olía á eld mikillar óánægju stórs hluta þjóðarinnar með stjórn landsins vegna meintra svika í forsetakosningunum síðasta sumar.

Hafði mótandi áhrif

Montazeri var áhrifamikill klerkur í Íran og höfðu hugmyndir hans um stjórnmál mótandi áhrif á marga Írana. 

Montazeri er þannig hetja í augum margra Írana en hann sat á áttunda áratugnum í fangelsi vegna andófs gegn Pahlavi Íranskeisara.

Um tíma var hann álitinn líklegur erkiklerkur en kom ekki lengur til greina eftir að hann féll í ónáð hjá Ruhollah Khomeini erkiklerk.

Stuðningsmenn Mirs-Hosseins Mousavi, frambjóðandans sem þeir telja að hafi verið sviptur sigri í forsetakosningunum í júní, hafa flykkst að útförinni og hrópað nafn Mousavis.

Öryggissveitir hafa handtekið tugi stjórnarandstæðinga en á vef Los Angeles Times segir að fylgismenn Montazeri noti netið til að koma á framfæri óritskoðuðum upplýsingum um útförina og átökin í kringum hana.