Barack Obama Bandaríkjaforseti hefur fyrirskipað að kerfi sem haldið er yfir grunaða hryðjuverkamenn verði endurskoðað og rannsakað verði hvernig á því stóð að maður sem skráður er á slíkan lista komst um borð í flugvél með sprengjuefni í fórum sínum.

Hinn 23 ára gamli Nígeríumaður Umar Farouk Abdulmutallab var settur á lista yfir hugsanlega hryðjuverkamenn í síðasta mánuði eftir að faðir hans tilkynnti yfirvöldum og bandaríska sendiráðinu að hann hefði áhyggjur af hegðun sonar síns. Abdulmutallab hafði þá sent fjölskyldu sinni skilaboð þar sem hann tilkynnti þeim að hann væri hættur í meistaranámi og hygðist slíta öllu sambandi við þau.

Alls hafa bandarísk yfirvöld þrjá lista yfir grunaða hryðjuverkamenn og var Adbulmutallab á lista yfir þá sem minnst hætta var talin stafa af, ásamt um 550.000 öðrum mönnum. 18.000 nöfn eru á listanum yfir menn sem meiri hætta stafar af og 4.000 nöfn á lista yfir farþega sem ekki á að hleypa um borð í flugvélar undir neinum kringumstæðum.

Obama hefur nú kallað eftir því að farið verði yfir þetta kerfi til að tryggja að upplýsingarnar komist til skila til þeirra sem taka ákvarðanir um að hleypa fólki um borð. Abdulmutallab ferðaðist frá Nígeríu til Amsterdam og komst þaðan um borð í flugvél á leið til Detroit án athugasemda. Stuttu áður en vélin átti að lenda gerði hann tilraun til að kveikja á sprengjunni undir teppi sem hann hafði yfir sér en var yfirbugaður af farþegum og starfsfólki.

Abdulmutallab er kominn af vel stæðu fólki í Nígeríu, en þar í landi er ekki óalgengt að yfirstéttarfólki sé hleypt í gegnum öryggisgæslu án skoðunar.