Frá Oxford-háskóla.

Breski hagfræðingurinn David Blanchflower, sem áður sat í peningastefnunefnd seðlabanka Englands, hefur lýst því yfir að fátækir hafi styrkt ríka til náms í of mörg ár. Blanchflower lýsir þessari skoðun sinni í breska blaðinu Observer í dag og kallar þar eftir því að takmörk á skólagjöld verði hækkuð þannig að háskólar megi rukka ríka nema um hærri gjöld á meðan fátækari nemum verði útveguð fjárhagsaðstoð.

Breskum háskólum var nýlega tilkynnt að framlög ríkisins til þeirra verði skorin niður um 135 milljónir punda á næsta ári. „Það brjálaða í þessu er að fólk er tilbúið að borga gríðarlega peninga til að senda börnin sín í einkaskóla á grunnskólastigi, næstum því 30.000 pund á ári fyrir nám í Eton, en þeir eru ekki tilbúnir að borga fyrir háskólanámið þeirra," segir Blanchflower.

„Háskólana sárvantar rekstrarfé. Svo við látum hina ríku borga markaðsverð og notum peningana til að styrkja þá fátækari til náms." Blanchflower er sjálfur prófessor í hagfræði við Dartmouth háskóla í New Hampshire, sem talinn er til „ivy legue" háskólanna í Bandaríkjunum.

„Þar borgar fólk 50.000 dollara á ári, raunverð menntunarinnar, og samt flæðir umsóknum yfir okkur. En helmingur nemendanna fær styrki." Blanchflower segir breska yfirstéttarnema kvarta yfir því að þurfa að borga 3.000 pund fyrir menntunina þegar hún kostar í raun og veru 30.000 pund. Hann segir há skólagjöld halda nemendum við efnið, þeir flosni síður upp úr námi og velji frekar námsleiðir sem geri þá frambærilega á vinnumarkaði. Blanchflower er hinsvegar líka á þeirri skoðun að það sé óráðlegt og mikil synd að ríkisstyrkir til háskóla séu skornir niður á tímum sem þessum.

Ummæli Blanchflower hafa fengið blendin viðbrögð og m.a. verið varað við samanburði hans við bandaríska skólakerfið, því í Bandaríkjunum sé litið á æðri menntun sem fjárfestingu, en í Bretlandi sem mannréttindi.